Īstuodis

Naskai vyss pīsamiersīs, voi nav akcektāts. Deļ tam pošu reizi asu bloga atvaļinuojumā. Tys i vinkuorši. Nu, vot. Maņ tai sasagribē.

Klausīs, kai beja….

Ar kursabīdrim vīnā lekcejā aizarunuom par vaļsts īstuodem… nu i.. ē.. maņ vysod i bejušys interesantys attīceiya ar juom.

Ir bejs jūki slimneicā, kod tevi najem ar salauztu atslāgys kaulu, jo tam vāg pīruodiejuma nu rentgenaparāta ,“jo mes strādājam tikai ar svaigām taumām”, tod tu sasajiut par spruodziņi kuram juomeklei vīta zam trepu, kur damiert i natrauceit cīnejamū personalu.

Voi VID puorvaļdē, kod maņ beja veļ tys vacais telefons, i jam signāls izgrīzts nu pasauļslavenuos kinys “Cykvāka bārns”. A, signāls ta taids, kur Boņs bļaun “Zagļi, zagļi, zagļi, munu Žyku… KONSERVANTŪS”. Nu, i es tai siežu pi lōžys, aiz kurys tante iz sovys vērtivis ( jo sovaižuok tū navar nūsaukt, jo tu esi apmekleituojs), zvona maņ telefons. “Zagļi,zagļi,zagļi….” A, cylvāku padaudz, vysi nūdūt goda atsksaitis. Vysi pasaver iz munu pusi, a, stresa situacejā, veļ navaru izviļkt nu kārmyna telefonu… Golu golā es soku – “Atsavainoju, ite maņ zvanē.” Breinums manis apkolpuojūšuo tante nūsmej ari, bet tod puorbaudūt papeirus puorgrīž acs, tod pasaver iz mane i soka:

– Kā! !!!! Jūs nezinat kā aizpildīt šo blanku?! – 

Es naapjiukstu i soku taisneibu:

– Atvainojos, bet es tiešām NEZINU, kā aizpildīt ŠO blanku, jo es viņas neaizpildu katru dienu. – 

Nā, nu VID uorā izklivu sveiks un vasals, bet ar zeimūgu sev – Tu tok namuoki taidu i taidu banku azipiļdeit i veļ VIDu nūsauc par zagļim.

 

Tuoļuok par īstuodem. 

 

Paguošuo goda beiguos, vajadzē īsagrīztīs taidā īstuodē, kai CSDD. Beja juosamaina autovadeituoja aplīceiba, kurai beidzīs dereiguma termeņš.

Ok. Asu kluot i eimu vydā. Juopībiļst, ka tei īstuode niu ir remontā i pošreizejuo darbeiba nūteik taiduos, kai pagaidu telpuos.
Ok. Daeimu, a tī,kai jau vysur juonūspīž pūga i juodaboj sovs numureņš. Stuņdinīks ruoda koč kur ap 16.00. Taitod, guodoju, ka ļaužu byus mozuok i ar vysu mudrai tikšu skaidreibā. Tai ari ir. Asmu vīneigais. Sajemu numureņu, eimu da kasis. Kasē prosa:

 – Ko tad vēlamies? – 

– Sameineit tīseibys! – 

– 16 lati! Kad iedegsies jūsu numuriņš, ejiet pie tā kunga – kasis tante nūruoda maņ iz vīnu sovu ūsainū kolegu.

– Labi – 

 

Īsadag numureņš

 

– Tagad, jūs varat iet! –

– Paļdis, paļdis! – 

 

Nā, nu ok, nūdūmoju, ka tai laipni pret vīneigū klientu izatur. Gondreiž sasajiut atsagrīžūt sevi školys laikā.

Daeimu pi ūsainuo kunga.

 

– Ko vēlamies? – 

– Samineit vadeituoja aplīceibu. – 

– Labi. Sēdieties. Personu aplieconošu dokumentu. – 

Izdoru vysu, kai vāg.

– Tagad nofotogrāfēsimies un parakstīsimies. – 

– Kaida runa! – 

– Kuru no fotogrāfijām liksim? – 

– Vysys naizadevušuos, licit kuru grybot. – 

– Labi. Tagad parakstamies uz šī mazā ekrāniņa.

Pasarokstu.

– Derēs? – 

– Nā. – 

– Labi.- jis nūdzieš vacū verseji – Parakstamies tagad. – 

 

Vysu izdoru, tod maņ tys ūsainais kungs soka:

 – Lūdzu, uzgaidiet. Pēc minūtēm 10 – 15 tiesības būs gatavas! – 

 

Tai, kai asu vīneigais apmaklātuojs, jiutūs breivi. Lānai apvalku kurtku, tod raugu izrediviet placu sumceņu nu vacajīm čekim, jo juogaida to saceituos 10 – 15 minotys.

Napaīt ni minotys pīcys ūsainais kungs, nas munys jaunuos tīseibys. Daīt da golda, pasaver munuos jaunajuos tīseibuos i skaļā bolsā soka : 

 – OSKARS ORLOVS PĒC TIESĪBĀM! – 

Dūmoju, ka jau tai, to tai. Pīlācu kuojuos, izstīpu rūku, lai mani vīnu pošu krāslu ryndā pamaneitu i klīdzu jam atbiļdi:

 – Šeit! ŠEIT! – 

Tīseibys ir i vyss ok.

Nu i vyss.

 

Ooot, kai beja.

Advertisements

BezPVN ”Reits”

Kotram reits suocās sovaižuok. Kurš nu reitim vingroj, kurš izreizis sataisa kopeju, kurš īdams iz lobīrīceibom pyrma īslādz datoru. Šaļtim, reits ir koč kuo suokums, cytureiz non-stop režīmā gulietīšonys laiks.

Grupys BezPVN „Reits” ir atguos garu ceļu nu 2006.goda decembra kod tyka pasceits „Pyrms vuorda”. Bet ir atguojs. Tys laikam ir labi.

Aļbumā ir desmit dzīsmis. Tok maņ ruodīs, ka tī drusku nūtykuse šmaukšanuos, jo principā pyrmū i pādejū dzīsmi var apvīnuot vīnā. Tod palīk deveņis. Tok skaitlis desmit ruodīs ir izvāļāts na viņ taipat. Tik daudz (desmit) godi paliks pošai grupai.

„Reitā” pasaruoda jaunuokys dvasmys i jutūne. Kuorsovys Stagg ģitarys ir nūmaineitys i pasavārts plašumā. Īprīkšejīs manga style vuoceņš veiksmeigi pamaineits iz interesantu geštaltu. Tys tuoļuok atsaspūguļoj ari dzīšmu tekstūs. Pasaruoda eksistencialisma vaicuojumi. Cylvāku vyspuorejuos attīceibys. Kur mes asom kasdīnā, ar sevi, rutinu, cytim. Kas paliks piec teve? Voi cylvāks jūprūjom ir cylvāks itym dzeivuošonā?

Es, kai cylvāks, kas vaira nūsajam ar tekstim, varu saceit, ka albumam ir gradzynveida kompoziceja.

Saleidzynuojumā ar pyrmū albumu palics mozuok baļtiskumu, tok na puoruok. Cytys latgalīšu grupys turpynoj grākuot vaira. Pasauļa muzykys (na viņ muzykys) vibrācejis, nikur napazyud juos īzaskon tuoļuok albumā. Suocūt jau nu prymuos dzīsmis, kur Sigur Rós īskaņis tevi aizvad gondreiž voi Džona Butlera (John Butler) okeānā. Vysaidys muzykys novitatis pasaruoda i vysa albumā gaitā (deļ seve tys vyss pīmynātīs patyka dzīsmā “Zuoleite”). Tys viņ ir normali, ja tu kai muokslinīks meklei sevi, i napalīc spēlēt īrostajā kuļturys nomā ar treis akordu dzīsmeņom tresidesmit melodeju virpulī.

Jauki ari, ka ir dzīsme ar ailinīka O.Slišana vuordim. Tai īpazeistynūt ari ar latgaliskuom ailem. Jo, atsazeisem, ka dzīmeņu vīgļuok ir nūsaklauseit i vysu dīnu pīdzīduojumu dunguot liedza, na škirsteit gruomateņu.

Beiguos tūmār tai, kai napamat napabeigteibys sajiuta. Ruodīs tūmār, ka tys varātum byut viļteigs guojīņs, jo teik sūleits ūtrys albums. Tai, kai niule grupys BezPVN sastuovā ir divi deputāti, ceroms jī sūliejumus piļdeis. Gaideisem albuma B pusi, lai varom saprast kaidu pylnū verseju jī pīduovoj par itū „klusiešonys laiku”.

Nūvālu spieļuot, meklēt, atkluot sevi tuoļuok, jo durakā nūmiert paspēsem vysod.

 Raibīs

Skaline

Apreļa beigys/maja suokys teišom proīt latgaliskā jutūnī. Marko Rotko centrs, tiuleņ vaļā spryudeis Goru. Vyss nūteik, koč pa mozeņam, tok nūteik. Vieliešonom, kas tyvojās, ari juosoka paļdis, jo ari Festivalu parkā koč kas suok nūtikt i celtnīku šaļtim vaira, kai myusu. Ir taids stimuls “vysu pabeigt veļ sovā vaļdiešonys laikā” :D. Ak, itī deadlaini. (klusijenotsmīkli). Tok ni par politiku runojamais tekstūs. Politka smird i tū zyna vysi. Bet tok tei syudu kustynuošonys teoreja i prakse pateik. Verīs, kai vysi taipoš nūzīstom mutem jemās pa syudu tolkom i duorzim. Uh!

Redz, tai smīkleigi saīt. Nu suoku vyss, vysys idejis leluokūtīs teik nūlīgtys i nūraideitys (Gors, Rotko centre, i.t.t), i lobuok tū naudu izdalēt pensionarim i maizei. Tok beiguos bez tuo voi ituo mes navarim i naspēsem īsadūmuot sovu kasdīnu i pylsātys tuoļuokū dzeivi. Par byuvem i kuormim – viņ iz prīšku! Lai izadūt nūturēt jau tai pacaltū lateņu! – 😉

Par šovim. Niule ir beidzīs kuortejais šovs, kur otkon uzvarieši puorstuovi nu Latgolys. Tys jau nav nikaids breinums. Kur latgalīši cytur var dzierdeit sovejūs i sovys dzīsmis, ka ni dasadolūt vysaiduokūs šovūs (LNT,TV3….)? Bolsova i bolsuos par tuom pošom dzīsmem. Nikuo jauna. Juouzspīž iz pareizajuom jiutu pūdzeņom, kai – latgaļeite,
mameņis, dīveņš, patriotiskuos regiona jiutys, i vysi mes sovi, lobi cylvāki. Atsazeišu gūdeigi, es taidu šovu vadeits…bez mozuokū sirds puormatumu pajamu i nūzīdoju tū latu kam cytam, koč voi suņu patversmei. Šovs, tys ir feins instruments i bizness, kas atsamoksoj treiskuorteigi. Bet šovs ir šovs. I vysi gryb kūnaviņ redzeit, i tod,
mēleitem uorā, atsaspāruši nūbolsuot. Kod tyka izgudruota giljotina, Francejā ļauds iz giljotiniešonu guo ar vysom saimem. Izkluoja paladzeņu, sasāda, leidza veins, uzkūdys i vērēs gilotiniešonu in da live.

Tod vēl ir tai, ka latgalīši reklamei veļ narealizeitus projektus tuoli leidz tū pošu suokumam i dora tū uzcīteigi. Darēt var, tok es ceru i guodoju, lai beiguos nasaīt čiks i blamāža. Jo tei blamāža nasaīt tev pošam, bet jau kai vysam regionam kūpsummā.


Ka kaids leluoks, skaļuoks projekts, to tei ir kai vizeitkarte. Ja pyrmais dorbs, debeja ira … nu, teiksim – taids kaids jis ir – i saprūtamu īmesļu dieļ jam vajadzē īraudzeit dīnysgaismu, to ūtrajam “bārnam” juobyut jau ar kvalitatis zeimi. Spylgts pīvadums itam ir grupa “Dabasu Durovys” ar sovu ūtrū CD “Styklu vītā skaņa” (2012.). Tī jiutams, ka zāni struoduoši ar atdevi vysus tūs godus nu pyrmuo aļbuma “Ļepetnīks” (2008.) izīšonys.
Tod veļ ir taida eipašeiba, kai poškritika. Tok te pasaruod vysaidi momenti. Vīnam jei ir, bet verūtīs apleik – ūtram juos nav. Varbyut NAV vyspuor. Obys galejeibys ir beistamys. Grybu ari dasaceit, ka na vyss, kū tu dori sovā radūšajā sferā ir tys genialais i pats lobuokais kū cylvākam, uzsveru, – vajadzātu redzēt voi dzierdēt, voi skaiteit.

Bārzi jau saplaukuši. Vakar beja pārkiuņs, zibšņi, i leits. Pateikamys puormainis.

Kai Suņs atskrē i aizskrē

Nu suokuma par puorejū. Tok vyss atsatīc iz vysim.

Sastdiņ, kod vysi tolkuo i vuoce cytu māslus (27.04.2013.), es beju iz skotuvis i runys konkursu “Vuolyudzāni”. Pasuokums, kai jau taidam pasuokumam juobyut. Pagarš i nūgurdynūšs. Tok taidim juobyun, jo principā jam nav vainis. Interesantai jau pasalykuos tys fakts (kas tyka ari nūtwītuots) , zālē ļaužu pylns i 90% runoj čiulyskai. Bet bārns ta atvasts i jam juonūskaita gabaleņš latgaliskai. Es dūmoju, ka tei atzineiba i diploms vaira teik školuotuojam vai mamai, na bārnam. I… nu, ka puorkuoptu puori sovam mozvierteibys, (voi kaidam tī) kompleksam, moš byutu lobuok. Tai vāluok i rūnās “pareizuo latvīšu volūda” ar – daiesim, proskriesim,  i t.t.

”Vuolyudzānūs” bez babys tyka skateita ari muna bārnu dzeja, (cyts paņteņš,kas zamuok) tod maņ saguo taida kai debeja tym lauceņā. Itys pasuokums aplīcynoj ari tū traģiskū faktoru, ka bārnim literaturys kū skaiteit NAV. Naloģiski ruodīs, ka 9.klasis škoļneica publiski deklamei Plōciņu Mases memuarus, esiti tolkam jāgu poša nu tuo teksta nasaprosdama. Taida biedeiga situaceja. Na viņ latgalīšu literaturā. Vysā vaļstī. Ja vaļsts atbolsta kaidus tulkuojumus voi originalliteraturu, tod latgalīši, kai zynoms, tū dora kai entuziasti.

Es ar dzedu,

oba div,

saleimēm mes špaļerus.

Cyti soka tapetis,

a, cyti nasoka nikai.

 

Nu, vo!

Saleimēm mes špalerus

Mozā, jaukā ustobā.

ite niule dzeivuos dzeds.

 

Varēsem mes škandalēt,

i vīns ūtru pavuicēt.

A, cytu reizi

kotrys sovu,

sovu dzeivi rozstuostēt.

 

Es jam socialā teiklā

uztaisiešu kontu.

Jis maņ pastuostēs par gonim.

Turpynuosem, dzeivuosem

mes ar dzedu kūpā.

Vysod byušu i palikšu

jam par zvaigzni rūkā. 

Verūtīs škarsteikā vysi dūmoj lobys dūmys i idejis. Tys jauki. Pasauļs ik šaļteņu sasadūd rūkuos…. :D.  Cylvāki cenšās byut lobuoki, bet palīk taidi kai ir. Jo maneitīs sovu attīksmi i īrodumus ir gryuši. Deļ tam, socialūs taiklūs, lobuok nūšāruot, īteikt kaidu spuornuotu teicīņi, voi Koeljū muļkeibys, i tū tymā pat laikā laikuot i aizmierst. Tai i šārojom vysu dzeivi.

Kod mani filmē LTV (augustā byus Vaļuka i LTV naskaids kūpeigi taiseitīs raidiejums par ltg literaturu) , jī prasē par munim tuoļuokajīm planim, i es atbiļdieju, ka tiulinejuokajūs planūs ir – gruomateņa bārnim – . Kas, kai, tū maneis. I jī nūprosa, voi ta pasarakstiesi, kai Raibīs Suņs. Es soku, ka nā. Kai Raibīs.

Bet itys palīk kai logo. Sekojit vieļuokaijai info. 😉

Dog

Tod aizadūmuoju…, jā. Redz. tai sāit, ka Suņs atskrīn i aizskrīn. I jis aizskrē tai pašsaprūtami. Par pasauļa nataisneigumim i glupumim bļaut var i izabļaut, bet pasauļa napuorgrīzsi. Sovu suopi izbļuovi i vsjo narmaļna. Suņi maņ jūprūjom pateik. Nikas nav mainiejīs. Kai ari vairuok vysaiduos aprynduos teiku saukts par Raibū. Atā Suņ.

čudziki

Kod tu nūmiersi
es lyugšūs rauduodams
viņ eisti navariešu pasceit i saprast

par kū i deļ kam
telefonā
vairs nav i nabyus kam pīzvaneit
viņ elektriskī skoni 
nu Krāslys zonys
pīp-pīp
lepetnīki
skrīn i daleipst lūgā.
čudni naskaidi. 
/R.S/