Snīga valši

Siežu virtuvē. Pīklusynuota gaisma nu tvaika nūsyucieja, i verūs pa lūgu. Putinei snīgs. Vyss apleik sanastys snīga čupeņis. Beidzūt var sasajust kai zīmā. Ausīs skaņ Šopēna Noktirne OP.9 Numur 2. Jei maņ uzbur tū mistiskū zīmys sajiutu, kurys itūgod nav bejs. Veļ ari nav -30 lai jū dzeitu pa ceļi. Zīmsvātki… nu taidi…. nikaidi. Sātā ar capumim i kači. Tei kompoziceja ir ari atrūnama kinā ”Bad Santa”. Ituos kinys vieršonuos, jau izataisiese par sova veida tradiceju. Atguodoju ari Dita Rietuma beja nazkur miniese jū, kai vīnu nu sova Zīmyssvātku kinu topa, kas byutu juonūsaver.

Vyspuor piec jaungoda navā saprast – kas nūteik apkuortejūs. Pagaidam nikuo loba. Personeigi maņ suocēs seseja…. tod vēl mistiskī stresi, kas ir naatjemama dzeivis sastuovdaļa. Tok jūs navāg tiuļi laist sev kluot. Nervi ta vīni i nu jīm var suoktīs vysaižuokys hvarobys, nu kurejuom tod gryuši tikt vaļā. Voi cīši duorgi. Bet puorsvorā myusdīnu medicina sastuov nu pensioneru i mozu bārnu vacuoku naudys.

Pyrms svātkim nūtyka RA jauktuo kuora ”Sonitum” i  veiru kamerkuors ”Graidi” pyrmssvātku koncerts. Vysā vysumā beja skaiški.

Bet tod ”ūtrymā daļī” RA  studejūšū pošpuorvaļdis (laikam) reikuotīs koncerts, kurymā uzastuo augstškolys vītejī talanti… Nu, te vyss aizliduo pa viejam, mudruok, kai aizliekšoi pats Rūdolfs ar sorkonū dagunu. Suokūt ar divim rēperu džekim, ar sovu izpiļdiejumu i dzīsmis vuordim ”(..) сука любовь, сука любовь (..)”. Pa skaistū! Veļ beja naveikli i PAGARI numeri, bikli vadeituoji…bet kū tī. Vīneigīs īteikums – tīm organizatorim, ( kas (es cereju) naskraida pakaļ vadeituojam īspīlātuos ūzeņuos, kuram ķekars izaspīds i par jū rāc vysa škola) – . Puorskaitit, nu suokuma koč scenareju, izdūmojit, kai pajūkuot ar publiku i uztaisit kaidu mēģinuojumu, i apsaverit, cik i kaidā kvalitātē prīkšnasums, i voi atbylst tematikai. Teiri amizanti skanātu ”(..) сука любовь, сука любовь (..)”  koncertā, kas veļteits Māmeņdīnai. Nadūmojit, ka tai dūmoju es vīns. Ave!

Tai, kai niule rudiņs beja saplyuds ar zīmrudini, kas dreižuok izavēre kai puorkauseits studiņs, pīvieršu uzmaneibu sevis īvīstajam teicīņam  - komentaru kari -. Vāg že jaunu šovu, nā?! Kai tys izapauž, laikam nav juoskaidroj. Vīn pusfināls ir tys, ka jebkurā rokstā, kur byus pīmynāts koč kas par latgaliskū, tī bolsuošona i klaviaturys baksteišona aizīt leidz boltkvēlei. Nikuo jauna! Koč paskaiteitu cytu literaturu… Vyss veļās i ripoj. Aizrypoj ta da  cytom viestim kū apsprīst vysūs socialajūs portālūs. A, ja tev nav TV, kaimiņim, dorbabīdrim nav par kū ar tevi parunuot, itu palīc duraks voi čudaks. Voi obi kūpā.

Vyspuor maņ seseja.  I čajs iz golda atsaļs…

Nūvieleju vysim itym godā sasnīg sovus mierkus. Ka nav to padūmuot par taidim. Ja kuram vāg – pamainit prioritatis

I, našķaudit vīns ūtram sejā.

---